حكاية الثعبان والأسد والفيل قصة باللغة المصرية للأطفال بنشيد
حواديت منى حارس للأطفال قبل النوم
انهاردة هحكلكم حدوتة جميلة للأطفال قبل النوم باللغة المصرية ،وطبعا كلنا عارفين اهمية الحدوتة وتأثيرها على أطفالنا وازاي بتسيب أثر وفرق في حياتهم ، اقدم لكم في موقع قصص واقعية حدوتة الثعبان والأسد والفيل قصة جميلة للاطفال قبل النوم .
حدوتة الثعبان والأسد والفيل
كان يا مكان فى قديم الزمان فى الغابه البعيدة ، اللى كانت مليانه بالحيوانات الكتيرة والطيور العجيبه والغريبة ، كان الأسد اسودة ملك الغابه لأنه كان شجاع وقوى، بس للأسف القوة لوحدها متنفعش ، لازم مع القوة يكون عندنا العقل والحكمه وحسن التصرف فى اى موقف نقابله في حياتنا .
ودا مكنش صحبنا اسودة بيتميز بيه خالص ، وكان معين الفيل فلفول حكيم للغابه وأى مشكله كانت محتاجه عقل وحكمه ، كان الفيل فلفول بيحلها ، وفى يوم من الأيام كان فلفول بيقرأ كتاب ، وسمع صوت خناقه كبيرة وجرى فلفول بسرعه يعرف أيه الحكايه .
الفيل فلفول لقى الثعبان بسبس بيتخانق مع الثعبان هسهس ، وبسرعه زعق فلفول وقال :بس يا هسهس بس يا بسبس ، فيه أيه انتوا بتتعاركوا مع بعض ليه يا ثعابين ، رد هسهس وقال : ألحقنى يا فلفول انجدنى يا حكيم بسبس عايز يخرجنى من بيتى ، بعد متعبت ونظفته وبالزينه الملونه زينته ، ألحقنى يا حكيم ألحقنى.
وبسرعة رد بسبس وقال : يا سلام يا هسهس انت أخدت بيتى وعلشان نظفته وبالزينه زينته خلاص بقى بيتك طب أزاى، يا فلفول وبسرعه قال فلفول ممكن تسكوتوا انتم الاتنين لو سمحتم وأنا هسألكم بالدور، وسكتت التعابين ورد فلفول وقال : اتكلم انت يا بسبس انت بتقول ان البيت بيتك.
بسبس قال :أيوة يا فلفول بيتى وبيت أجدادى من قديم الزمان ، ورثته عن امى الحاجه بسبوسه الكبيرة ، وقفلته ورحت عشت جنب النهر لان ولادى بيحبوا يستحموا ويلعبوا فى النهر ، وبروح بيت أمى كل فترة انظفة واعد فيه انا والاولاد أفتكر امى وابويا ، ولكنى كنت مسافر بقالى فترة ولما رجعت لقيت التعبان هسهس قاعد فيه هو وأولادة ، ولما سألته انت بتعمل أيه هنا يا هسهس قالى انه عايش هنا من زمان ، طب أزى يا فلفول أزاى دا بيت أمى وأجدادى أزاى انا تعبت وهسهس مش رادى يمشى ويسيب بيتى وبيت عيلتى، ولما رحت للأسد كبيرنا وملك غابتنا قالى خد حقك بالقوة يا بسبس، وانا ضعيف صحتى على أدى يا حكيم الغابه .
رد فلفول وقال : هاه خلصت كلامك يا بسبس ، بسبس قال : خلص الكلام يا حكيم ، و هنا فلفول قال : وأنت يا هسهس أيه رأيك فى كلام بسبس ، رد هسهس وقال البيت دا بيتى يا فلفول ، أيوة بيتى وأنا أحق بيه من بسبس أنا اللى نظفته ولمعته وبالزينه الملونه وزينته ، وبعد مكان بيت مهجور بقى بيت حلو وأمور يعنى أنا أحق بيه من بسبس ، لأنه سابه وأهمله وأنا لقيته ونظفته وبالشرايط الحمرا والخضرا زينته ، وكمان تعبت اوى يا فلفول فيه ، يعنى دا بيتى وأنا أحق بيه وكمان ملك الغابه قالى خد حقك بالقوة وأنا أقوى من بسبس ، وبلعب رياضه يعنى دا بيتى يا حكيم الغابه بيتى.
ورد فلفول وقال خلاص خلصت كلامك يا هسهس يا رياضى، رد هسهس وقال أيوة خلاص خلص الكلام يا فلفول خلاص ، رد فلفول وقال البيت مش بيتك يا هسهس البيت دا بيت عيلة بسبس ، ومش معنى انك نضفته وبالزينه زينته انه بيتك ، لا يا هسهس لا مينفعش نلاقى حاجه مش بتاعتنا وناخدها من غير منسأل بتاعت مين ، كدة غلط يا هسهس وكمان حرام ودى بتسمى سرقه.
رد هسهس بسرعه وقال أزاى يا فلفول دا كان بيت مهجور ، ومكنش حد بيستخدمه ، فلفول رد : مينفعش يا هسهس كان لازم تستأذن من صاحبه الأول ، ولو وافق انك تاخدة يبقى من حقك تاخدة وتزينه، وتعيش فيه كمان لكن غير كدة تسمى تعدى على املاك الغير يا هسهس ، وانت يا سى بسبس أزاى تسيب بيت اهلك مهجور ، وانت كنت عايش فيه طول عمرك لازم تهتم ببيت العائله ، يا بسبس لازم ودى أخر حاجة من عيلتك.
وزعل بسبس من نفسه انه أهمل فى بيت وتاريخ عيلتة ، وزعل بردوا هسهس من نفسه انه سرق حاجه مش بتاعته ، وكمان ضرب وجرى هسهس على بسبس وقاله سامحنى يا بسبس ، انا مكنتش اعرف انا كنت فاكر انى لما انضف البيت يبقى كدة بقى بتاعى خلاص ، ورد بسبس وقال انا مش زعلان منك يا هسهس انا اللى غلطان انى اهملت فى بيت وتاريخ عيلتى ولازم أهتم ببيت اهلى واجدادى.
وفرح اوووى فلفول من بسبس وهسهس ، وسابهم وراح يكمل الكتاب اللى بيقراة ، وبعد مسلمت الثعابين على بعض واتصلحوا وصل الاسد اسوده ملك الغابة وقال : هاه مين اللى غلب يا تعابين فيكم ، مين القوى اللى هياخد البيت دلوقتي ، مين انت يا بسبس ولا انت يا هسهس مين ، وضحكت الثعابين وقالت بالحكمة يا ملك الغابه ، بالحكمه هتتحل مشاكلنا أكيد مش بالقوة ابدا .
