ونستكمل مع المذيع مجدي توفيق ، وقناة احنا الاصل والباقي تقليد ، تحقيقية في جرائم القتل التي انتشرت في مصر ،من قتل الزوجات لازواجهم نتيجة سماعهم لحلقات برنامج نصائح زوجية ، الذي تقدمة احدى القنوات لتنصح المرأة بكيفية التعامل مع الرجل ، ولقد تحدثنا في الحلقات السابقة عن زكية التي كانت تضع لزوجها الحديد بالطعام وبعدها الكابتن تهاني بطلة كمال الاجسام واليوم مع دلوعة المجتمع والمجتمعات المجاوزة مدام ناني في قصة كوميدية ساخرة من موقع قصص واقعية بعنوان مدام ناني وبرنامج نصائح زوجية
مدام ناني وبرنامج نصائح زوجية
وهنا ابتسم المذيع مجدي قائلا:
– لا تستاهل يا حسين اللي جرالك الا مهند يا رجل دا كلام وفي حد يا عم حسين بيتجوز مدربة كمال اجسام يا رجل دانت لو اتخانقت معاها هتديك بالبوكس في وشك هطيرك ..والاخر كمان محدش عارف مين اللي قتل مهند يا كابتن لا عندك حق تعملي فيه اكتر من كدة ونسيب الكابتن تهاني ومهند ونروح للقصة التالته مع الرقيقة صاحبة الاصابع الطويلة مع دلوعة المجتمع مع مدام ناني انتظرونا بعد الفاصل واوعوا تغيروا القناة انا عارفك كويس ياللي غيرت القناة وهوصلك وهجيبك من وسط عيالك انتم عارفني كويس ، معاكم مجدي توفيق ..من قناة
” احنا الاصل والباقي تقليد ”
انتظرونا..
المشهد الثالث ” مدام ناني”
– قتلتي جوزك ليه يا مدام ناني المسدس اللي لقيناه جنب القتيل عليه بصماتك فمتحوليش الانكار مش هينفعك اعترفي احسن لك ؟
– وهنكر ليه يا فندم اصلا مش انا اللي قتلتله يا حضرة الظابط دي مراته التانية هي اللي قتلته؟
– مراته التانية بس التحريات بتقول ان القتيل مكنش متجوز غيرك انتي يا مدام ناني ؟؟
– وانت عاوزني استنى لما يتجوز عليا ولا ايه انت متعرفش انا مين وبنت مين في البلد وبرستيجي انا ناني سيدة المجتمع ؟
– لا مش فاهم يا مدام بصراحة ازاي المرحوم مكنش متجوز غيرك ومراته التانية هي اللي قتلته تيجي ازاي طيب فهميني علشان انا معنديش الا عقل واحد الله يكرمك ؟
– ايوة هي السبب وهي اللي قتلته انا هفهمك ازاي يا فندم بكل بساطة المرحوم كان بقاله اسبوع بيقرا في مجلات غريبة كدة ومقالات مش عجباني عن فايدة تعدد الزوجات ومميزات الزوجه التانية وانها بتقلل الاصابة بالضغط والسكر وبتزود العمر انا كنت مرقباه في صمت وساكته ومتكلمتش وعاملة نفسي مش واخدة بالي يا حضرة الظابط .. لغاية معملت بنصيحة المذيعة في برنامج ” نصائح زوجية ” اللي بيجي في التلفزيون بتشوفه ؟؟
– لا مش بشوفه يا ستي .. ها وايه هي النصيحة يا مدام ناني بتاعة المذيعة؟
– المذيعة قالت لما تلاقي جوزك بيقرا كتير في مجلات عن تعدد الزوجات وفايدته لصحة الرجل والكلام دا لازم تقتلي الفكرة في راسه بطريقتك واسلوبك
– ها وبعدين عملتي ايه يا مدام ناني ؟
– بس انا قتلت الفكرة في راسه برصاصة صغيرة من مسدسي بس دا اللي حصل يا فندم انا كنت بقتل الفكرة مش اكتر والفكرة هي اللي قتلته طيب بذمتك مين اللي قتله انا ولا فكرة زوجته التانية هي اللي قتلته؟؟
– لا عندك حق زوجته التانية يا مدام ناني هي دي فيها كلام يا شيخه …
وهنا ابتسم المذيع مجدي قائلا :
– لا يا مدام ناني انتى مظلومة ومقتلتيش الرجل فكرة مراته التانية ، هي اللي خلصت عليه وقتلته معاكي حق والله وانتم يا رجاله متعملوش فيها ناصحين اووى عاوزين ، تقروا مجلات عن تعدد الزوجات اتنيلوا اقروها في الشغل مش لازم يعني في البيت متجبوش لنفسكم مصيبة ، يلا الله يرحمك يا جوز مدام ناني كان راجل ابن حلال ونسيب ناني البسكوته اللي كانت بتقتل الفكرة في راس جوزها ومكنش قصدها ، تقتل الغلبان ونروح للقصة الرابعة والمخبر فوزية اللي اكتشفنا انها كانت بتشتغل مخبر سري للموساد الاسرائيلي مش عارفين اسرئيل مش هتسينا في حالنا امتى وبيتجسسوا علينا ليه ، وعلى بيوتنا .
وكمان بيزرعوا مخبرين سرين وسطينا بس مش هنقول تفاصيل علشان الشوشرة انتم عارفني مبحبش الكلام الكتير والفرقعات الصحفية اللي من النوع دا دي هنخدلها حلقة لوحدها نتكلم بالتفاصيل والادله وكله في الاجنده يا حضرات انتم عارفني مبتكلمش وخلاص .بس بعد الفاصل ..
انتظرونا اياكم حد يغير القناة ولا يطفي التلفزيون انتم احرار هعمل فيكم زي مدام ناني معملت في جوزها … وهقتل الفكرة في رؤسكم معاكم مجدي توفيق
من قناة ” احنا الاصل والباقي تقليد ”
انتظرونا .
