حماتي وكلماتها القاسية قصة مؤلمة باللهجة المصرية على لسان صاحبتها

اتجوزنا وكنت فرحانه اووى ، وكانت حماتي عايشة معانا بنفس الشقة ، بعد شهر جواز حماتي بدأت تتغير معايا اووى ،  وتتعامل بشكل قاسي وغريب دى كانت بتتجاهلني وتعاملنى بطريقة محرجة قدام الناس ،
مكنتش بردى اقول لجوزى علشان مكبرش الموضوع وبقول ست كبيرة ، بعد تلت شهور عرفت اني حامل
كنت فرحانه اووى وسعيدة وجوزى كمان كان سعيد ، لما روحت البيت وقلتلها لقيتها ادايقت اووى ومقلتش مبروك ، اعدت تزعق تزعق اووى وتقلي مستعجله على ايه يا ام سنان مفلوجة ، كلمتها صدمنى اووى ام سنان مفلوجة .

قولتلها انتى بتعملي كدة ليه يا امي انا عملتلك ايه ، قالتلي انتى عندك ضب وسنانك كبيرة ومعوجه ،
وانت وحشة  اووى ، ازاي وفقت بيكي لابني القمر دا اللي عيونه خضرا وشعره اصفر ، ومش هسامح نفسي على اللي انا عملته ، و اني تممت الجوازة دي ورضيت بواحدة زيك لابني البدر اللي بنات العيلة بتتمنى بس تكلمه ، يتجوزك انتى ليه المفروض نصيبه في واحدة قمر مش انتى .

اعدت اعيط اووى كلامها كان جارح ووجعني ، هو في هو حد بيختار شكله ايه ، دي  كلها خلقة ربنا ومين ليه في نفسه حاجة ، مهو ممكن واحدة جميلة بس اخلاقها وحشة ، ومتبرجه مهو ممكن واحدة جميلة بس تطلع عينه ، اعدت اصرخ واعيط بقهر وبعدها روحت لاهلي ، وجوزي جه يصالحنى بس انا مقدرتش ارجع تانى واعيش معاها  لشهور طويلة ، لكن كنت مضطره ارجع بعد مولدت وجبت بنتى ، وهي دايما تعايرني باسناني انا حاولت اعمل عمليات تجميل كتير واعمل تقويم في اسناني بس كلها منفعتش ، وشكلها معقول مش وحش اووى وجوزى راضي ومفيش مشكله ، وانا مش وحشة اووى انا عادية وشكلي عادى جدا بس هي عاوزة لابنها عروسة جميلة وموديل من بتوع الافلام وشبه الممثلين ، عايشة في عذاب وكارهة حياتي ودايما تنكد عليا ولا قادرة اطلق علشان البنت ولا قادرة اعيش في راحة  .